Управниот одбор на Македонското научно друштво – Битола ја одржа последната седница за 2025 година на 29.12.2025 со почеток во 16 ч. На седницата беа донесени повеќе одлуки потребни за да се обезбеди непреченото работење на Друштвото, беше усвоен Извештајот за работата на раководството на МНД во првата година од мандатниот период 2024-2026 година и донесена програмата за работа за 2026 година. Во продолжение е даден заклучокот од Извештајот за работата на МНД од 17.10.2024 до 31.12.2025 година поднесен од проф. д-р Даниела Андоновска-Трајковска, претседател на МНД:

„Во текот на 2025 година, Македонското научно друштво – Битола спроведе низа активности кои јасно ја отсликуваат неговата мисија за унапредување на научната и уметничката мисла. Друштвото активно дејствуваше во повеќе научни области, при што беа организирани научен собир, тркалезни маси и тематски трибини посветени на актуелни научни, уметнички и општествени прашања. Преку овие настани се овозможи размена на современи научни сознанија, интердисциплинарен пристап и продлабочување на соработката меѓу истражувачите од различни институции.

Посебен акцент во 2025 година беше ставен на одбележувањето на 65 години од основањето на Македонското научно друштво – Битола, промоција на научната и уметничката мисла меѓу поширокото граѓанство и публицистичката дејност. Одбележувањето на 65-годишнината од постоењето на Македонското научно друштво – Битола во 2025 година претставуваше исклучително значаен, содржаен и достоинствен јубилеј. Преку внимателно осмислена програма која опфати научни, културни, уметнички, едукативни и промотивни активности, МНД успешно ја истакна својата богата историја, континуитетот во дејствувањето и современата улога во научниот и културниот живот на градот и државата. Свеченото започнување со ликовна изложба, одржувањето на историски час на местото на основањето, како и свечената академија, не само што го потврдија значењето на МНД како најстаро научно друштво во Македонија, туку и ја нагласија неговата длабока поврзаност со Универзитетот „Св. Климент Охридски“ – Битола, со МАНУ, локалната самоуправа и пошироката општествена заедница. Документарниот филм „МНД – 65 години наука, уметност и култура“ претставува трајно сведоштво за придонесот на Друштвото и силна алатка за негово идно афирмирање. Покрај свечените настани, едукативните активности, изложбите на изданија и учеството на меѓународни конференции покажаа дека МНД не го гледа јубилејот само како чествување на минатото, туку и како поттик за идни активности, нови соработки и натамошен развој. 65-годишниот јубилеј ја потврди виталноста, релевантноста и општествената улога на Македонското научно друштво – Битола, создавајќи цврста основа за продолжување на неговата мисија во иднина.

Друштвото даде придонес во подготовката и промоцијата на научни трудови, зборници и стручни публикации, со што се поттикна научното творештво и видливоста на резултатите од истражувањата. Значајно место зазеде и работата со млади научници и студенти, преку нивно активно вклучување во проекти, предавања и научни расправи со цел јакнење на новите генерации истражувачи. Во рамки на своето работење, Македонското научно друштво – Битола ја зацврсти соработката со универзитетите, научните институти и сродни здруженија на национално ниво. Исто така беше остварена соработка со претшколските установи, основните и средните училишта, едукативните центри и факултетите во рамките на УКЛО. Преку партнерства и заеднички иницијативи, Друштвото придонесе кон подобро поврзување на научната заедница и поголема афирмација на научните достигнувања.

Исто така може да се заклучи дека во првата година од мандатниот период 2024–2026 година Македонското научно друштво бележи позитивен тренд на зголемен интерес и доверба од страна на научната и стручната јавност. Приемот на 14 нови членови од различни научни области придонесува кон зајакнување, интердисциплинарност и динамичен развој на Друштвото. Ова проширување на членството претставува значаен потенцијал за збогатување на научните активности, продлабочување на соработката меѓу одделенијата и понатамошно унапредување на улогата на МНД како релевантна научна и општествена институција.

Врз основа на реализираните активности, може да се заклучи дека Управниот одбор на МНД во првата година од мандатниот период 2024–2026 година работи стабилно, организирано и со јасна визија за развој на Друштвото. Преку редовно одржување на седници и активно учество на претставници од сите одделенија, беа донесени значајни и навремени одлуки поврзани со стратешкото планирање, реализацијата на програмските и проектните активности, издавачката дејност и приемот на нови членови во МНД. Вклучувањето на други тела на Друштвото во работата на седниците придонесе кон поголема транспарентност, координација и усогласеност во донесувањето одлуки. Оттука, работата на Управниот одбор до крајот на 2025 година создаде цврста организациска основа за континуирано и успешно функционирање на МНД во наредниот период.

Врз основа на реализираните активности и постигнатите резултати, може да се заклучи исто така дека Уредувачкиот совет на МНД – Битола во текот на 2025 година работеше континуирано, професионално и со висок степен на одговорност. Со редовно одржување на седници, доследно почитување на Правилникот за издавачка дејност и активна соработка со Управниот одбор, Советот успешно ја реализираше својата улога во планирањето, координацијата и унапредувањето на издавачката политика на Друштвото. Издавањето на значаен број публикации од различни области, како и отворањето постапки за нови наслови, сведочи за динамична, разновидна и квалитетна издавачка дејност. Дополнително, континуираното публикување на списанијата „Современи дијалози“ и „Прилози“, како и нивната тематска и научна релевантност, придонесоа за зголемување на видливоста и афирмацијата на МНД – Битола во културниот и научниот простор и во земјата и во странство.

Врз основа на изнесените податоци за изворите на финансии, може да се заклучи дека во првата година од мандатниот период 2024–2026 година Македонското научно друштво – Битола обезбеди функционална и стабилна финансиска поддршка пред сè преку проектно финансирање, донации и партнерска соработка со државни и локални институции. Овозможените средства придонесоа за успешна реализација на програмските активности, издавачката дејност и одбележувањето на значајниот 65-годишен јубилеј. Истовремено, рационалното работење и ангажманот на раководството во услови без ангажиран секретар резултираа со значителни финансиски заштеди. Сепак, евидентна останува потребата од зајакнување на сопствените извори на финансирање, особено преку поголема дисциплина и мотивација на членството за редовно плаќање на членарината. Во таа насока, во идниот период е неопходно Друштвото да развие поодржлив финансиски модел, кој ќе обезбеди поголема стабилност, предвидливост и сигурност во работењето, со цел целосна и навремена реализација на годишната програма и понатамошен развој на активностите на МНД – Битола.

Во изминатата година Македонското научно друштво – Битола успешно ја унапреди својата медиумска присутност и јавна видливост. Преку редовно информирање, ажурирање на веб-страницата и активна соработка со медиумите, МНД обезбеди поефикасна комуникација со јавноста и поголема препознатливост на својата дејност и активности.

Севкупно, дејноста на Македонското научно друштво во 2025 година се одликуваше со континуитет, квалитет и јасна ориентација кон развој и промоција на науката и уметноста. Остварените активности претставуваат стабилна основа за идно проширување на дејноста и понатамошно зајакнување на улогата на Друштвото во научниот и општествениот развој“.